II. Hegaztien janleku lehiaketa

Abian da II. Hegaztien janleku lehiaketa, zorioneko dira gure patioko patxizar, amilotx, buztangorri eta gainontzekoak. Aurkeztutako janleku dotoreenak gure patioan ipiniko dira. Ez utzi pasatzen hegaztiei esku bat bota eta sari dotoreak irabazteko aukera!!

Goi Zikloa: Unión Farmacéuticara bisita

Azaroaren 20ean Zumaia BHI-ko Administrazio eta Finantzetako Zikloko ikasleek Donostiako Unión Farmaceútica de Gipuzkoa enpresa bisitatzeko aukera izan zuten. Bertan, enpresaren funtzionamenduari buruzko informazio orokorra jaso zuten 30 urtez zuzendari izandakoaren ahotik, solasaldi zinez interesgarri batean. Ondoren, 30.000 erreferentzia inguru kudeatzen dituen enpresaren biltegi automatizatuaren funtzionamendua bertatik-bertara ikusteko aukera izan zuten, zikloan lantzen duten Logistikako Moduluaren adibide praktiko txundigarria hau ere. Bisitak bi ordu eta erdi iraun zuen eta balorazio oso positiboa egin beharra dugu.

Begiratu argazkiak

Bizikasi: eskola jazarpenaren inguruko hausnarketa

Urola bailarako eskola publikoko irakasleok Bizikasi ekimena dela eta, eskola jazarpenaren inguruko hausnarketa egingo dugu gaur eta bihar Azpeitiko Basazabal jauregian.

Indarkeria matxistaren aurkako nazioarteko eguna

Azaroaren 25ean, Tratu ona guztiona lelo hartuta, Zumaiako giza katean parte hartuko dugu. 11:00-etan Eusebio Gurrutxaga plazatik hasiko da katea eta alde zaharrean ibilbidea egingo du. Eskualde osoko heziguneekin batera eta Hezkidetza Foroaren barruan antolatu da ekintza, atzoko prentsaurrekoan azaldu genuen bezala.

Asiskoren mintzaldia

Atzo "Herri curriculumetik euskal curriculumera" hitzaldi zikloa abiatu genuen Asisko Urmenetareren mintzaldiarekin. Lehenengo irakasleek jaso genuen eta arratsaldean guraso, ikasle eta herritarrek. Euskal Curriculumaren beharraz hitzegin zigun, ikasteko eta baita desikasteko ere. Historian zehar guk auzoekiko izan dugun irudia eta haiek gurekiko izan dutena nola aldatzen joan den erakutsi zigun.

Oso aberasgarria izan zen eta bidean jarraitzera animatu gintuen.